LaMarinière, ... ¬de¬: ¬La¬ Maison Academique contenant les Jeux : du picquet, du Hoc ...
Paris : Loyson, 1659:
 
 

LE PLAISANT IEU DE Cartes de Taros,

 recreatif, subtil & diuertissant,

 qui se ioüe à plusieurs sortes de ieux,

tant & si peu de personnes que l'on voudra.


Si ce Ieu de Cartes de Taros n'a pas esté mis plutost en lumiere dans nostre France, c'est comme ie croy que les François ne demandent que l'abregé de toutes choses: & ce qui fait qu'il n'a pas eu grand cours, c'est que tres peu de personnes ont la connoissance des regles qu'il y faut obseruer pour y ioüer, lequel ieu est le plus diuertissant qui se puisse trouuer dans toute sorte de ieux, & duquel ie puis dire auec verité, qu'il n'y a aucune fourberie, ny filouterie: Les Suisses & les Alemans ne ioüent point ordinairement à d'autres ieux, & mesme en France, comme à Lyon, Marseille, & autres lieux oú ils ont connoissance de la gentillesse de ce Ieu, dans l'obseruation des regles qui suiuent pour vous en donner la connoissance.

Regles du tres-diuertissant ieu de Taros.

I.

Premierement vous obseruerez que les Ieux de cartes ordinaires qui se ioüent en France, sont composez de cinquante-deux cartes, & celle de Taros, est composé de soixante & dix-huict; & neantmoins il y en a qui vont iusques à quatre-vingts & d'auantage, le plus ou le moins est indifferent, d'autant que chaque triomphe portent chacune leur nombre, celles de France en portent treize chacune, & celles de Taros quatorze: celles de France sont distinguées par quatre qui sont, Picque, Trefle, Coeur & Careau, & celles de Taros font aussi diuisez en quatre differentes, sçauoir le Roy, la Reine, le Cheualier, le valet, le 10. le 9. le 8. le 7. & 6. auec l'as d'espée, autant des bastons, autant de couppes, & autant de deniers; le tout fait cinquante-six cartes, & le surplus des cartes on les nomme Triomphe qui sont au nombre de 21. cartes, depuis le basteleur iusques à la carte que l'on appelle le Monde, & vous remarquerez en passant que le fou sert d'excuse, & pour donner à entendre ce mot d'excuse, c'est quãd vne personne vous ioüat vne haute carte de Triõphe, soit Roys Reynes, ou quelque autre carte que vous ne puissez pas prendre, vous montrerez vostre fou, & vous mettrez la carte du fou en la place de vos leuées, & apres que vous aurez ioüé toutes vos cartes, celuy qui a le plus de leuée, gaigne la partie.

II.

Le premier ieu se ioüe à tant & si peu de cartes que l'on voudra aprés auoir conuenu ce que vous voudrez ioüer, peu ou beaucoup, à la discretion de la compagnie.

III.

Ce ieu se ioüe comme à la Triomphe forcée, le fou vaut cinq, & sert d'excuse, comme il a esté dit cy-deuant, le Monde vaut quatre, le basteleur aussi 4. les Rois quatre, les Reines trois, les Cheualiers deux, le Valet vn, & l'on met au ieu chacun ce qui est conuenu par la compagnie: Comme vn demy teston, cinq sols; & en suite vous donnerez les cartes, vous ioüerez comme à la Triomphe, c'est à dire que celuy qui a le plus pris de Rois, Reines, Cheualiers, Valets, le Monde, le Basteleur, & le Fou, gaigne &c. Il faut compter vos poincts, comme il est dit cy-dessus de la valeur des cartes, & celuy qui contera le plus, gagnera ce qui est mis au ieu.

IV.

Il se ioüe en peu ou beaucoup de personnes, en 50. poincts, plus ou moins, & on donne à chacun douze cartes, le Fou vaut cinq, & sert d'excuse, les Rois vallent quatre, & l'on compte autant de cartes que l'on gaigne, plus que ces douze contre autant de poincts comme il pert de cartes, & quand ils en ont pris, on les demarque, & celuy qui a le premier cinquante, gaigne.

V.

Ce ieu se ioüe encore d'vneautre maniere, c'est à sçauoir que les quatorze cartes, Roy, Reine, Cheualier, Valet, & le reste d'espée, on les appelle la rigueur, & emporte les autres Triomphes de bastons, couppes, & deniers, & se ioüe comme à la Triomphe forcée; c'est à dire, n'ayant point de la carte que l'on vous ioüe de deniers, bastons, ou coupes, vous ietterez de la rigueur, & emporterez: mais si on vous iette d'vne autre Triomphe, & que vous en ayez, vous estes obligé d'en ietter, & alors la plus haute l'emporte, le Fou marque cinq & sert d'excuse.

VI.

Il vous sera loisible de ioüer à tant & si peu de poincts que vous voudrez, & à tous ces trois ieux qui renonce pert la partie.

VII.

Ostant les Triomphes & le Fou, on peut ioüer auec les cartes à tpotes sortes d'autres ieux qui se ioüent en France, comme au Picquet, à la Triomphe, au Berlan, &c.
 

AVTRE IEU DE CARTES de Tarros.


Ce Ieu se nomme la Triomphe forcée, & se ioüe comme il a esté cy-deuant dit, en tant & si peu de personnes que l'on veut, aprés auoir conuenu, de ce que l'onveut ioüer, vous obseruerez les reigles qui suiuent.

I.

Premierement on donne à chacun de la compagnie cinq cartes, & l'on ne retourne point les cartes.

II.

Celuy à qui il arriue dans ces cinq cartes le Fou, il retire ce qui'l a mis au ieu; & aussi celuy retirera son enjeu à qui luy arriuera dans ses cartes le Basteleur, celuy à qui il arriuera la Force, retirera deux en-jeux; & celuy à qui il arriuera la carte appellée la Mort, emportera tout ce qui est au ieu, sans que personne ne puisse rien pretendre.

III.

S'il arriue que vous ayez en vostre main les 2. ou 3. cartes cy dessus nommées, vous retirerez, comme dit est, sans que vous discontinuez à ioüer, ce qui restera sur le tapis.

IV.

S'il reste quelque chose sur le tapis, chacun poursuiura son ieu, & celuy qui aura plus de leuée, gaignera ce qui restera au ieu.

V.

La primauté l'emporte; c'est à dire, que celuy qui aura les premieres leuées, gagnera.

VI.

Qui renonce perd la partie.

Fin des Taros.

AVTRE IEU QVE LES SVISSES ioüent ordinairement.


Avec ces mesines cartes de Tarros, les Suisses ioüent à trois personnes, & donnent toutes les cartes, à la reserue de trois cartes, que celuy qui donne les cartes prend, & rencarte trois autres cartes telles qu'il luy plaist, & ioüet ce ieu en trois parties: celuy qui gaigne le plutost ces trois parties, emporte ce qui est conuenu de ioüer: Ils font valoir le Monde 5. le Basteleur 5. les Rois 5. & de toutes les 4. façons, les Reines 4. autant l'vne que l'autre, les Cheualiers autant les vns comme les autres, & l'on y ioüe comme à la Triomphe; ces Triomphes sont 21. cartes:
 

SÇAVOIR,

1. Le Basteleur.
2. La Papesse.
3. L' Empereur.
4. L' Imperatrice.
5. Le Pape.
6. L' Amoureux.
7. Le Chariot.
8. La Iustice.
9. L' Hermite.
10. La rouë de fortune.
11. La Force.
12. Le Pendu.
13. La Mort.
14. La Temperance.
15. Le Diable.
16. La maison de Dieu.
17. L' Estoile.
18. La Lune.
19. Le Soleil.
20. Le Iugement.
21. Le Monde.


Le Fou, vaut trois & sert d'excuse, comme nous auons dit cy-dessus.

Fin du diuertissant ieu de Tarros.


Herausgegeben von
Hans-Joachim Alscher
Stand: 1. August 2002

Home